Elmar Bjarnason, landsliðsmaður í fótbolta, hefur undanfarið látið sig málefni jafnrétti kynjanna varða og fjallað talsvert um femínisma á Twitter-síðu sinni. Á dögunum sagði hann til að mynda að feðraveldið væri samsæriskenning, en eyddi því tísti.

Nú segir beinir hann sjónum sínum að launamisrétti. „Var að komast að því að menn fá 75% minna borgað en konur í módel bransanum! Þetta er að sjálfsögðu bara misjöfnun og hefur ekkert að gera með það að fyrirtækin græði meira á kvenkyns módelum, og þar af leiðandi eiga þær meira skilið,“ skrifar Elmar á Twitter.

Þess má geta að á mánudaginn sagði Elmar á Twiter að transfólk væri haldið geðveiki. „Eftir umræðu undanfarna daga hefur enn og aftur komið í ljós að þeir einu sem dæma eru skoðanafasistar íslensku hjarðarinnar. Ég er ekki að segja að vera transgender sé einungis geðrænn sjúkdómur heldur sýna rannsóknir að geðsjúkdómar eru mun algengari meðal transfólks, það er staðreynd,“ skrifaði Elmar á Twitter.

Hann segist þó engan dæma. „Ég dæmi engan útfrá húðlit, kyni eða kynhneigð og hef aldrei gert. Ef þessi pólitíska hreyfing sem transgenderhreyfingin er væri bar að berjast fyrir meira frelsi og meiri rétt fyrir fullorðið fólk sem má skilgreina sig, og gera það sem það vill við eigin líkama, þá hefði ég aldrei verið með neinar athugasemdir þótt ég sé ekki sammála hugmyndafræðinni,“ segir Elmar.

Hann segir að staða mála í Kanada hafi haft áhrif á skoðun sína. „En í dag eru kominn lög í Kanada sem gæti tekið börn frá foreldrum ef þau samþykkja ekki transgender hugmyndafræðina, byggt á litlum sem engum rannsóknum. Rannsóknir eru sammála um það að börn sem glíma við þetta vaxa í flestum tilfellum upp úr þessum hugsunum, en þrátt fyrir það er verið að gefa börnum hormóna til þess að stöðva þau á kynþroskaskeiðinu. Þetta getur haft varanleg áhrif á barn sem að öllum líkindum hefði vaxið frá þessum tilfinningum,“ skrifar Elmar.