Óhætt að segja að sannkallað HM-æði hafi gripið þjóðina eftir að flautað var til leiks á heimsmeistaramótinu í Rússlandi í síðustu viku. Akureyringar taka svo sannarlega þátt í gleðinni en settur hefur verið upp 75 tommu skjár við sundlaugina í bænum svo að bæjarbúar missi ekki af neinu.
Skjárinn er staðsettur við nýja potta sem teknir voru í notkun fyrir skemmstu. Um er að ræða tvo samliggjandi potta, mismunandi djúpa og með mismunandi hitastigi.
Í frétt um málið á vefnum Akureyri.is kemur fram að flestir leikir mótsins verði sýndir á skjánum ef veður og aðstæður leyfa.
