Síðasti inflúensufaraldur var óvenju mannskæður í Danmörku en 1.664 létust í faraldrinum. Ekki hafa fleiri látist af völdum inflúensu síðan veturinn 2010/2011. 56.113 Danir fóru í læknisrannsóknir síðasta vetur til að kanna hvort þeir væru smitaðir af inflúensu. Af þeim reyndust 16.093 vera með A eða B stofn inflúensu.

7.667 voru lagðir inn á sjúkrahús vegna veikinda af völdum inflúensu en þeir voru flestir með B stofn flensunnar. Meðalaldur sjúklinganna var 69 ár. Þetta kemur fram í fréttatilkynningu frá danska sóttvarnarlækninum.

95 prósent, þeirra sem voru lagðir inn, voru í áhættuhópi því þeir voru annaðhvort með króníska sjúkdóma eða eldri en 65 ára.

Þá jók það enn á innlagnirnar að bóluefnið, sem notað var, virkaði ekki nægilega vel því það veitti ekki vernd gegn þeim B stofni sem herjaði á Dani.