Á níunda tímanum í gærkvöldi var tilkynnt um ölvaðan ökumann sem hafði ekið á vegrið við Hafravatnsveg/Suðurlandsveg. Ökumaðurinn var handtekinn skömmu síðar og var þá talinn hafa verið búinn að vinna skemmdarverk heima hjá sér. Hann er grunaður um akstur undir áhrifum áfengis og/eða lyfja. Hann var vistaður í fangageymslu.

Á áttunda tímanum í gærkvöldi var ölvuð kona handtekin í Skeifunni en hún er grunuð um þjófnað og eignaspjöll. Hún vildi ekki segja til nafns og var því vistuð í fangageymslu.

Í nótt voru höfð afskipti af 17 ára stúlku, sem var farþegi í bifreið, en hún er grunuð um vörslu fíkniefna. Málið var afgreitt með aðkomu móður stúlkunnar. Tilkynning um málið var send til barnaverndaryfirvalda.

Á fimmta tímanum í nótt var tilkynnt um innbrot í verslun við Faxafen. Ekki er ljóst hverju var stolið.

Tveir ökumenn voru stöðvaðir í nótt grunaðir um akstur undir áhrifum fíkniefna. Annar þeirra reyndist einnig vera sviptur ökuréttindum.