Þorsteinn V. Einarsson, varaþingmaður VG og sá sem kom á fót #karlmennsku átakinu, birtir á Twitter-síðu sinni frásagnir karla sem þorðu ekki að segja þær undir nafni. Sögurnar fjalla um allt frá dúkkum yfir í kynferðislegt ofbeldi. Markmið átaksins er að varpa ljósi á neikvæð áhrif karlmennsku.

Nokkrar sögur snúast um karla sem vildu stunda einhverja tómstund sem telst almennt kvenleg. „Mér fannst dúkkur skemmtilegar en ég þurfti alltaf að nota Action Man,“ segir einn karlmaður. Annar segist alltaf hafa viljað æfa söng en hafi verið of hræddur til þess. Sá þriðji hefur svipaða sögu að segja, hann þorði ekki að æfa blak því það væri „hommalegt“.

„Hef verið einstöku sinnum verið kallaður kvenmannsnafni í líkingu við nafn mitt fyrir að vera of lengi að gera mig til,“ segir annar karl. Einn maður segist ekki hafa getað hugsað sér að leyfa kærustu sinni að borga fyrir mat. „Hef staðið mig að því að borga allan reikninginn þegar ég fer á stefnumót með kærustunni, þrátt fyrir að hafa ekki efni á því. Hún lagði síðan inn á mig eftir á. Fannst ég knúinn að deila þessu en hef ekki alveg kjarkinn í að setja þetta fram undir nafni,“ segir sá.

Nokkrar sögurnar fjalla um kynferðislegt ofbeldi. „Stelpa neyddi mig til þess að stunda kynlíf með henni, sagði vinum mínum bara að ég hafi flengriðið henni því ég skammaðist mín,“ segir einn karl. Annar segir einfaldlega: „Að tala um kynferðislegt ofbeldi sem ég lenti í því ég vil ekki vera að væla.“