Kínverska mjólkurdufthneykslið 2008 varð 6 börnum hið minnsta að bana og um 300.000 veiktust. Þá hafði eitrað mjólkurduft verið selt og foreldrar höfðu gefið börnum sínum það enda vissu þeir ekki að mjólkurduftið var eitrað. Þetta situr enn ofarlega í minni Kínverja og trausti þeirra á kínverski mjólkurframleiðslu er lítið sem ekkert. Þetta hefur opnað erlendum mjólkurframleiðendum góða leið inn á kínverska markaðinn.

Skandinavíska fyrirtækið Arla, sem er eitt stærsta mjólkurfyrirtæki heims, hefur náð að hasla sér völl í Kína og selur mikið af vörum sínum þar enda hafa Kínverjar mikla trú á matvælaöryggi á Norðurlöndum og treysta fyrirtækinu vel að sögn forstjóra alþjóðasviðs þess. Danska ríkisútvarpið skýrir frá þessu. Meðal helstu útflutningsvara Arla til Kína eru þurrmjólk, g-mjólk, lífræn mjólk og fjölmargar ostategundir.

Þurrmjólkin Baby&Me er frá Arla og er mjög vinsæl meðal Kínverja en ekki aðeins í Kína heldur einnig í Danmörku. Þannig hafa kínverskir ferðamenn oft tæmt hillur verslana af þessari eftirsóttu vöru og nú hefur verslunarkeðjan Coop neyðst til að setja þak á hversu margar dósir hver og einn má kaupa í einu. Mjög vinsælt er að taka þurrmjólkina með heim til Kína og gefa ættingjum og vinum sem þurfa á þessari vöru að halda en einnig eru dæmi um að fólk hafi verið að selja þurrmjólkina við heimkomuna.