Enn ein hópnauðgunin var tilkynnt til lögreglunnar í Malmö í Svíþjóð í gærkvöldi. Kona kærði þá nauðgun sem hún varð fyrir aðfaranótt laugardags. Margar hópnauðganir hafa verið kærðar til lögreglunnar í Malmö á undanförnum mánuðum en lögreglunni hefur ekki tekist að leysa þau mál en hefur fundið DNA úr grunuðum.
Aftonbladet segir að samkvæmt heimildum blaðsins hafi konunni verið byrluð ólyfjan aðfaranótt laugardags og hún síðan færð í hús í hverfi sem heitir Lindängen. Þar leikur grunur á að mennirnir, sem eru sagðir hafa verið fjórir til fimm og ungir að árum, hafi nauðgað konunni.
Sérfræðingum lögreglunnar tókst að sögn að finna sönnunargögn á vettvangi.
Þetta er enn ein hópnauðgunin í borginni á skömmum tíma en í nóvember og desember var tilkynnt um fjórar grófar hópnauðganir en þær áttu sér stað í fjórum hverfum borgarinnar. Lögreglan fann eins og áður sagði DNA úr meintum gerendum á mörgum þessara staða. Lögreglan hefur sett sérstakt rannsóknarteymi á laggirnar til að rannsaka þessi mál.