DV barst meðfylgjandi mynd sem uggandi sundlaugargestur tók í Álftaneslaug fyrr í dag. Þó bannað sé að taka myndir í sundlaugaklefum þá taldi konan það réttlætanlegt til að sýna fram á „stærri glæp“.
Á myndinni má sjá iðnaðarmann að störfum í lyftara og gat hann hæglega horft yfir nakta kvenmannskroppa í kvennaklefanum. Þó af myndinni að dæma sé hann niðursokkinn í vinnu sína er tækifærið fyrir hendi og truflaði það konuna sem var á leið í sund.
Konan, sem vill ekki láta nafn síns getið, segist hafa látið starfsmenn vita af iðnaðarmanninum. „Ég lét fólkið í afgreiðslu vita og þeirra svör voru á þá leið: „Já, við vorum einmitt að ræða þetta og þetta er ekki í lagi en takk fyrir ábendinguna“,“ segir konan.
Kári Jónsson, íþróttafulltrúi Garðabæjar, segir í samtali við DV að þó þetta líti illa út þá hafi starfsmaður sundlaugarinnar passað upp á að engin kona hafi farið í sturtu á meðan iðnaðarmaðurinn var að athafna sig. „Það var orðið ljóslaust í klefanum þarna og það eru fjórir metrar upp í ljósin. Við verðum að laga þetta með lyftu og meðan iðnaðarmaðurinn er upp í lyftunni þá eru starfsmenn að passa upp á að engin kona sé í sturtu hinum megin. Vissulega sér hann yfir því það er nú vandamálið í þessari sundlaug, ef einhver fer í loftið þá sér hann yfir,“ segir Kári og bætir við að það gangi ekki upp að fá iðnarmenn í að skipta um ljós að næturlagi.
„Viðkomandi sundlaugargestur gæti hafa orðið var við manninn og það er alveg rétt að það var vitað að hann myndi sjá ofan í kvennaklefann. Þess vegna var starfsmaður í kvennaklefanum.“