Hinn 19 ára Nikolas Cruz hefur játað að hafa myrt 17 manns í menntaskóla í Parkland í Flórída á miðvikudaginn. Árásin er sú mannskæðasta sem gerð hefur verið í skóla í Bandaríkjunum frá árinu 2012. Cruz mætti fyrir dómara í gær, ákærður fyrir að hafa myrt 17 manns með AR-15 hríðskotariffli eftir að hafa verið rekinn úr skólanum.

Bandaríska alríkislögreglan FBI hefur viðurkennt að hafa fengið ábendingu vegna Cruz í fyrra en hann birti myndir af sér með byssur á samfélagsmiðlum.

Samkvæmt bandarískum fjölmiðlum mætti Cruz í Marjory Stoneman Douglas menntaskólann í Parkland á miðvikudag og skaut þrjá nemendur fyrir utan skólann og gengið svo um gangana og skotið þá sem urðu á vegi hans. Mun hann hafa verið með bakpoka með skotfærum.

Cruz losaði sig svo við byssuna og þóttist vera nemandi þegar hann flúði af vettvangi. Þaðan lá leið hans í verslun Wal Mart og á McDonalds þar sem lögregla bar kennsl á hann og handtók hann klukkustund eftir árásina.
Þrír starfsmenn skólans og fjórtán nemendur létust í árásinni.