Rasual Butler, leikmaður í NBA-deildinni til margra ára, og eiginkona hans, söngkonan Leah LaBelle Vladowski létust í bílslysi aðfaranótt miðvikudags skammt frá Los Angeles.

Hjónin voru í Range Rover-bifreið sinni þegar Rasual missti stjórn á henni með þeim afleiðingum að hún valt og endaði á steyptum vegg. Slysið varð um klukkan hálf þrjú í Studio City og staðnæmdist bifreiðin á bílastæði verslunarmiðstöðvar.

Butler var 38 ára en Vladowski 31 árs. Butler þessi lék í NBA-deildinni í mörg ár. Hann var valinn af Miami Heat árið 2002 og lék með liðum eins og Los Angeles Clippers, Toronto Raptors, Indiana Pacaers, Washington Wizards en nú síðast, árið 2016, var hann á mála hjá San Antonio Spurs. Butler skoraði 7,5 stig að meðaltali í leik á ferli sínum í deildinni.

Fyrrverandi samherjar hans hafa minnst hans eftir að fregnir af slysinu spurðust út. Meðal þeirra var Pat Riley, forseti Miami Heat, sem sagði hann hafa verið frábæran leikmann, einstakan liðsfélaga, en, umfram allt, góða manneskju.

Eiginkona hans, Vladowski, var R&B-söngkona og vakti fyrst athygli í þriðju þáttaröð hina geysivinsælu þátta, American Idol. Vladowski endaði í tólfta sæti í þáttunum og skrifaði síðar undir samning við útgáfufyrirtæki Pharrel Williams.