Fyrir stuttu voru björgunarsveitir Slysavarnafélagsins Landsbjargar á Snæfellsnesi kallaðar út til leitar að tveimur mönnum á Kirkjufelli.
Þetta kemur fram í tilkynningu frá Landsbjörgu. Þar segir einnig:
„Mennirnir voru við göngu á fjallið en töpuðu slóðanum og gerðu það eina rétta, að kalla eftir hjálp. Aðstæður á fjallinu eru ekki góðar, undirlag blautt, vindur og myrkur að skella á.
Fyrstu hópar björgunarmann eru að leggja af stað á fjallið og munu í fyrstu lotu leggja áherslu á svæðið umhverfis gönguleiðina.“