Bára Halldórsdóttir, sem stóð að baki upptöku af samtali sex þingmanna á barnum Klaustri í nóvember, er nú mætt fyrir Héraðsdóm Reykjavíkur.

Viðtalið við Báru byrjar á mínútu 23:01

Bára var boðuð fyrir dóminn þar sem fjórir skjólstæðingar Reimars Péturssonar, lögmanns, hafa lagt fram beiðni um vitnaleiðslur og öflun sýnilegra sönnunargagna vegna málsins.

Í Morgunblaðinu í dag kom fram að forsenda beiðni lögmannsins sé ákvæði í lögum um meðferð einkamála. Beiðnin verður ekki skilin öðruvísi en að dómsmál kunni að verða höfðað gegn Báru.

Boðað hefur verið til samstöðufundar með Báru fyrir utan Héraðsdóm í dag og þegar þetta er skrifað eru fjölmargir mættir.

Blaðamaður DV sem er á svæðinu segir að nánast sé fullt út úr dyrum í héraðsdómi og eru þjóðþekktir einstaklingar í hópi gesta. Meðal þeirra má nefna Jón Gnarr, fyrrverandi borgarstjóra. Þá eru á svæðinu Gunnar Smári Egilsson, fjölmiðlamaður og stofnandi Sósíalistaflokksins, Mörður Árnason, Sólveig Jónsdóttir, formaður Eflingar og Sanna Magdalena Mörtudóttir, borgarfulltrúi Sósíalistaflokksins.

Morgunblaðið hafði eftir Rannveigu Ernudóttur, sem er skipuleggjandi fundarins, í dag að mikilvægt sé að sýna Báru stuðning og að hún sé ekki ein og eigi þakklæti skilið. Á Facebooksíðu fundarins er fólk beðið um að geyma mótmælaaðgerðir og að sagt að Bára hafi beðið fólk um að mæta ekki í gulum vestum.