Þegar haldið er af stað í ferðalag um afskekkt svæði skiptir miklu máli að tryggja að bíllinn sé í góðu lagi, þú hafir síma meðferðis og í versta falli að einhver viti af ferðum þínum.

Óhugnanleg sjón blasti við lögreglumönnum í norðurhluta Ástralíu í vikunni þegar þrír einstaklingar fundust látnir við bifreið á afskekktum stað, rúmum 200 kílómetrum norðvestur af Alice Springs.

Þrír einstaklingar; 19 ára karlmaður, 19 ára kona og 3 ára barn fundust látin í gær og leiddi rannsókn lögreglu í ljós að tólf ára drengur var einnig með fólkinu. Hann var hins vegar hvergi sjáanlegur. Leit að drengnum skilaði árangri í morgun þegar hann fannst látinn skammt frá bifreiðinni.

Í fréttum ástralskra fjölmiðla kemur fram að fólkið hafi að líkindum dáið úr vökvaskorti eftir að bíllinn bilaði. Fjarskiptasamband er ekki upp á marga fiska á þessum slóðum og er talið að fólkið hafi ekki getað látið vita af sér á þessum fáförnu slóðum.

Jody Nobbs, yfirmaður hjá lögreglu, segir við Sydney Morning Herald að vegfarendur þurfi að tryggja að bifreiðar séu í lagi áður en haldið er í ferðalög um fáfarna vegi. Þá sé mikilvægt að hafa vatn og mat meðferðis ef illa fer. Nobbs segir að líklega hafi ekki fleiri verið í bifreiðinni en lögregla mun leita af sér allan grun hvað það varðar.