„Mér finnst þetta alveg hræðilegt. Ég er ekki einu sinni viss um að ég hafi verið viðstaddur þetta. Ég var með þeim fyrstu til að fara.“ Þetta segir Ólafur Ísleifsson, einn þeirra sem var viðstaddur alræmdan fund þingmanna Miðflokks og Flokk fólksins, spurður um hvað honum finnist um orð og hljóð sem þar voru látin falla um Freyju Haraldsdóttur.

Líkt og hefur verið greint frá þá kallaði Bergþór Ólason Ingu Sæland, formann Flokks fólksins, „húrrandi klikkaða kuntu“ en um svipað leyti í upptökunni stafar Ólafur Ísleifsson, þingmaður Flokk fólksins, enska orðið „cunt“en sleppir fyrsta bókstafnum og segir að það vanti einn staf til mynda orð yfir konu. Brandarinn snýst um að fá meðhlæjendur til að segja orðið „cunt“ en ekki „aunt“. Gunnar Bragi svarar að bragði „Silja Dögg“. Eftir hlátrarsköll þá heyrist einn þingmaður góla „gamli pungur“.

Ólafur segir að það sem hafi verið sagt á þessum fundi sé óverjandi.  „Já, já. En mér finnst þetta algjörlega óverjandi og óforsvaranlegt.“

En af hverju varstu þá að taka undir eitthvað sem þér finnst óverjandi?

„Ég tók ekki undir neitt, hvað varðar þetta sem þú ert að spyrja mig um.“

En þegar þú varst að stafa „U N T“ og setja „C“ fyrir framan?

„Ég setti ekki „C“ fyrir framan. Ég setti „A“ fyrir framan.“

Varstu að segja „aunt“? Hver var brandarinn bak við það?

„Það er til að draga fram … Þú sérð það … „aunt“, bara það er ekkert flókið við það. Ég sagði bara „hvaða orð gefur það?“ Það myndar orð fyrir konu en það vantar einn staf fyrir framan. Sá stafur er „a“. Þá færðu „aunt“ og það er frænka.“

Er það orð yfir konu? Frænka?

„Er það ekki?“

Eftir að ummælin um að Inga Sæland væri kunta, þetta fylgir strax eftir þínum ummælum. Heldurðu að fólk trúi þessu, Ólafur?

„Bíddu, bíddu. Þetta er ekki útskýring. Heyrir þú ekki [í upptökunni] þegar það er sett „a“ fyrir framan?“