Tveggja mánaða stúlka lét lífið á Balí eftir að hafa verið hent úr bíl á ferð. Móðir hennar er grunuð um verknaðinn og talin þjást af fæðingarþunglyndi

Stúlkan var stödd með móður sinni á Balí í Indónesíu en móðir hennar hafði ferðast þangað frá Bandaríkjunum á meðan hún var ófrísk, segir á vef The Daily Mail. Mæðgurnar voru í bifreið sem átti að aka þeim út á flugvöll svo þær gætu ferðast til heimaslóðanna en snérist móður stúlkunnar, Nicole Stasio, skyndilega hugur og bað bílstjórann sinn að snúa við.

Hún er sökuð um að hafa því næst hent dóttur sinni út úr bílnum og í kjölfarið sjálf stokkið út. Talið er að hún hafi þjáðst af fæðingarþunglyndi og ætlað að fyrirfara sér. Nicole lifði þó af, en dóttir hennar lést af áverkum sínum sjö klukkustundum eftir atvikið.

Málið er hið sorglegasta. Nicole hefur ekki gefið upp hver faðir stúlkunnar er og ekki hefur verið hægt að yfirheyra hana vegna málsins því hún er á spítala þar sem hún þjáist af alvarlegu þunglyndi.