Helgi Hrafn Gunnarson, þingmaður Pírata, spurði dómsmálaráðherra á Alþingi hversu margar kærur hafa borist lögreglu frá árinu 2007 vegna afbrota þar sem einstaklingur telur að sér hafi verið byrluð ólyfjan sem dregur úr meðvitund hans, sjálfstjórn eða getu til að taka sjálfstæðar ákvarðanir. Helgi Hrafn spurði einnig hvort liggi fyrir verklagsreglur um meðferð og skráningu slíkra mála ásamt því að spyrja ráðherra hvort hún telji að það komi skýrt fram í hegningarlögum að það sé refsivert brot að byrla einstaklingum ólyfjan.
Í svari dómsmálaráðherra kemur fram að um 500% aukning hefur verið á kærum til lögreglu vegna byrlunar, eða frá því að vera 16 árið 2007 í það að vera 78 árið 2017. Ráðherra segir einnig að samkvæmt upplýsingum frá embætti ríkislögreglustjóra liggi ekki fyrir verklagsreglur um meðferð og skráningu mála þar sem grunur leikur á að um byrlun hafi verið að ræða. Samkvæmt upplýsingum frá embætti lögreglustjórans á höfuðborgarsvæðinu liggja fyrir drög að slíku verklagi, þar sem áhersla er lögð á að bæta skráningu þessara tilvika, en það hefur ekki verið innleitt hjá embættinu. Telur ráðherra einnig að ákvæði almennra hegningarlaga séu fullnægjandi að því er snertir þá háttsemi að byrla einhverjum ólyfjan. Hún tekur það fram að það sé einnig mat ríkissaksóknara samkvæmt upplýsingum frá embættinu.