„Sambandið var svolítið þannig að, sko, hann var í rauninni að búa til sína klámmynd. Ég átti alltaf að stynja ógeðslega hátt þegar við vorum að stunda kynlíf. Ég átti að vera bara eins og í klámmynd, þú veist,“ segir Lilja Hrönn Einarsdóttir í stuttum búti af stærra viðtali sem sýnt verður í þættinum Allir krakkar á RÚV í kvöld.

Í viðtalinu lýsir Lilja Hrönn brengluðu ofbeldissambandi sem hún var í með fyrsta kærastanum sínum. Parið var lengi saman en kærasti hennar stundaði það að þvinga hana til að búa til kynlífssenur sem hann hafði séð í klámmyndum. Lilja Hrönn segist ekki hafa sagt neinum frá þessu ofbeldi á meðan á sambandi stóð.

„Nei, í rauninni, þú veist, ég hélt bara að samband ætti að vera svona. Hann var búinn að sannfæra mig um að þetta væri eðlilegt. Ef mér leið ógeðslega illa, innst inni fannst mér þetta ganga yfir mín mörk, þá náði hann alltaf að snúa því upp á mig,“ segir Lilja Hrönn og heldur áfram.

„Í rauninni vissi ég að þetta væri rangt, ég vissi að þetta væri eitthvað sem ég vildi ekki, ég vissi að ég væri skíthrædd við hann en ég hélt að þetta væri eðlilegt,“ segir hún.

Þátturinn Allir krakkar er á dagskrá klukkan 20.40 á RÚV í kvöld og fjallar hann um kynferðisofbeldi og kynferðislega áreitni, með sérstakri áherslu á að fræða ungt fólk um mörk og samþykki. Þátturinn er unninn í samvinnu við Stígamót og tengist fjáröflunarátaki þar sem safnað er fyrir forvarnarstarfi Stígamóta. Í þættinum verður rætt við brotaþola kynferðisofbeldis í unglingasamböndum, sem og fólk sem starfar með ungu fólki að fræðslu um þessi mikilvægu málefni. Bæði foreldrar og forráðamenn barna og unglinga, sem og ungmenni, eru hvött til að horfa á þáttinn.