Erlendur ferðamaður féll í Svínafellslón í Öræfum um kl 13:20. Björgunarsveitir af svæðinu voru kallaðar út ásamt sjúkrabíl frá Klaustri og þyrlu Landhelgisgæslunnar.
Þetta kemur fram í tilkynningu frá Lögreglunni á Suðurlandi.
Fram kemur að maðurinn hafi komist úr lóninu af sjálfsdáðun rétt áður en björgunarsveitarmenn úr Öræfum komu á vettvang. Hann var kaldur og hrakinn eftir volkið, en varð ekki meint af.
Þyrlunni, sem og öðru hjálparliði hefur verið snúið frá vettvangi og verður viðkomandi fluttur á Kirkjubæjarklaustur til frekari aðhlynningar.