Fyrir 56 milljónum ára bráðnaði heimsskautaísinn og hitastigið á jörðinni hækkaði mikið, varð mun hærra en það er í dag. En getur hugsast að þessi atburður, sem er nefndur Paleocene-Eocene Thermal Maximum (PETM), hafi verið af völdum nú útdauðrar tegundar eða menningarsamfélags sem hafi verið við lýði áður en mannkynið kom til sögunnar.

Þetta hljómar eins og veitt beint upp úr potti gallharðra samsæriskenningasmiða en samt sem áður hafa vísindamenn rannsakað þetta af fullri alvöru. Í grein í The Atlantic fjallar Adam Frank, prófessor í stjarneðlisfræði við Rochester háskólann, um málið. Hann segir í greininni að rannsókn á þessu geti veitt innsýn í hvernig á að finna líf utan jarðarinnar eða þau áhrif sem við höfum á plánetuna okkar.

Hann bendir á að ef iðnvæðing fyrri tegundar hafi verið skammlíf þá geti reynst erfitt að finna ummerki um hana. Það geti þurft mikinn áhuga og nýstárlegar rannsóknaraðferðir til að finna ummerki um skammlífan atburð.

„Með öðrum orðum, ef þú ert ekki að leita beint að þessu getur verið að þú munir ekki finna þetta.“

Hann segir í grein sinni að rannsakendur hafi hugleitt hvað okkar menningarheimur geti skilið eftir í steinum sem menningarheimar framtíðarinnar geta fundið, plastið sem við losum í sjóinn, ummerki um áburðarnotkun og aðallega ummerki um notkun okkar á jarðefnaeldsneyti.