„Tvískinnungur dómsmálaráðherra í málinu er sá að fylgja lagabókstafnum þegar kemur að uppreist æru en sveigja frá honum þegar hún greindi Bjarna frá upplýsingum, sem áttu að sæta trúnaði samkvæmt lögum. Ráðherra á ekki að komast upp með að skýla sér bakvið lög – bara þegar hentar,“ skrifar Kristín Þorsteinsdóttir, ritstjóri Fréttablaðsins, í leiðara blaðsins í dag.
Þar fer Kristín yfir stjórnarslitin og veltir því fyrir sér hvort Bjarni Benediktsson, formaður Sjálfstæðisflokksins, muni standa af sér þetta mál eins og hann hefur komist í gegnum mörg önnur vandræðaleg mál síðustu misseri:
„Skiptir þá ekki máli hvort það hafa verið viðskiptatengsl hans frá því fyrir hrun, Vafningsmálið svokallaða, Ashley Madison lekinn, Panamaskjölin eða tímasetningin á birtingu skýrslu um aflandseignir Íslendinga, svo eitthvað sé nefnt.“
Kristín segir að Bjarni hafi nokkuð til síns máls þegar hann kallar eftir meiri stjórnfestu hér á landi og hún efast um að trúnaðarbresturinn sem kom upp í vikunni hafi verið nægilegt tilefni til stjórnarslita.
Greinina má lesa í heild hér.
