Aðalmeðferð í máli Thomas Møller Olsen, sem er sakaður um að hafa myrt Birnu Brjánsdóttur, heldur áfram í dag við Héraðsdóm Reykjaness. Fyrstur til að bera vitni nú rétt eftir klukkan níu var Sebastian Niko Kunz, réttarmeinafræðingur hjá Landspítalanum.
Myndir úr krufningu Birnu verða sýndar og óskaði fjölskylda Birnu eftir því að fjölmiðlafólki yrði vísað út úr réttarsal á meðan. Grímur Grímsson, yfirmaður miðlægrar rannsóknardeildar hjá lögreglunni á höfuðborgarsvæðinu sem fór með rannsókn málsins, mun bera vitni klukkan 10:30.