William Dathan Holbert, bandarískur ríkisborgari, hefur verið dæmdur í 47 ára fangelsi í Panama, syðsta ríki Mið-Ameríku, fyrir fimm morð.

Holbert þessi var dæmdur fyrir að ræna og drepa fimm bandaríska ríkisborgara í landinu á árunum 2007 til 2010. Fyrrverandi eiginkona hans, Laura Reese, var dæmd í 26 ára fangelsi fyrir sinn þátt.

Holbert viðurkenndi að hafa myrt einstaklingana til að komast yfir fasteignir þeirra, að því er AP-fréttastofan greinir frá. Hjónin voru handtekin árið 2010 þegar þau reyndu að komast til Níkaragva frá Kosta Ríka, en það sama ár fundust lík fjögurra fullorðinna einstaklinga og barns í gröf á lóð lítils mótels sem Holbert átti.

Holbert var sakfelldur fyrir að myrða Mike Brown, eiginkonu hans og ungan son þeira árið 2007. Árið 2010 myrti Holbert konu að nafni Cheryl Lynn Hughes sem átti og rak lítið hótel í Panama auk þess sem hann myrti mann að nafni Bo Icelar.

Holbert, sem gekk undir viðurnefninu Wild Bill, hafði tengsl við samtök hvítra þjóðernissinna í Norður-Karólínu áður en hann flutti frá Bandaríkjunum. Hann flutti frá Bandaríkjunum eftir að hann skildi við fyrri eiginkonu sína og lýsti sig gjaldþrota.