George Pell er þriðji æðsti maður Vatíkansins
George Pell, þriðji æðsti maður Vatíkansins, hefur verið ákærður fyrir kynferðisbrot í heimalandi sínu, Ástralíu. Pell, sem er 76 ára, hefur löngum verið gagnrýndur fyrir að bregðast seint og illa við ásökunum um kynferðisbrot presta í heimalandi sínu.
Frá þessu var greint í gærkvöldi.
Ekki liggur fyrir í hverju ásakanirnar gegn Pell felast, en lögreglan í Viktoríufylki segir að um sé að ræða fjölmarga ákæruliði vegna brota sem framin voru fyrir margt löngu. Pell starfaði meðal annars sem prestur í Ástralíu á áttunda áratugnum áður en hann varð erkibiskup í Melbourne.
Pell hefur verið fyrirskipað að mæta fyrir dóm þann 18. júlí næstkomandi. Kaþólska kirkjan í Ástralíu sagði í yfirlýsingu að Pell myndi mæta – svo lengi sem hann fengi leyfi frá læknum til að ferðast – og hreinsa nafn sitt.
Pell er nú kominn í leyfi frá starfsskyldum sínum og hefur Vatíkanið lýst yfir stuðningi við hann. Pell segir sjálfur að hann sé hafður fyrir rangri sök. Það mun væntanlega koma í hlut dómstóla að skera úr um það.