Þrjátíu ár liðu þar til Zoya Tuganova, sjötug kona í borginni Chelyabinsk í suðurhluta Rússlands, áttaði sig á því að dóttirin sem hún hafði alið upp í 30 ár var ekki líffræðileg dóttir hennar.

Dóttir hennar og dóttir annarrar konu sem lá á fæðingardeildinni um sama leyti höfðu víxlast eftir fæðinguna. Nú hefur Zoya ákveðið að höfða skaðabótamál gegn sjúkrahúsinu í Chelyabinsk vegna mistakanna.

Þungbært Það reyndist Zoyu þungbært þegar sannleikurinn kom í ljós.

Zoya sagði í samtali við rússneska fjölmiðla fyrir skemmstu að hana hafi grunað að ekki væri allt með felldu þennan örlagaríka dag árið 1987 þegar hún fékk dóttur sína í hendurnar. Hún sagðist ekki þekkja barnið og grunaði að stúlkan væri ekki sú sem hún kom í heiminn skömmu áður. Heilbrigðisstarfsfólk lét þennan grun Zoyu sem vind um eyru þjóta og sannfærði hana um að stúlkan væri hennar.

Svo fór að Zoya fór heim með annað barn, stúlku sem nefnd var Katya, en hún fæddist með hjartagalla. Á sama tíma fór önnur kona, Elvira Tuligenova, heim með dóttur Katyu sem nefnd var Lucia.

Að sögn Zoyu var líf líffræðilegu dóttur hennar enginn dans á rósum. Báðir foreldrarnir, Elvira og maður hennar, voru atvinnulausir og ólst hún því upp við kröpp kjör. Þegar stúlkan var þrettán ára var hún send á munaðarleysingjahæli eftir að móðir hennar lést en á sama tíma var faðir hennar í fangelsi fyrir morð.

Zoya sagði við rússneska fjölmiðla að öll þessi ár hefði hana grunað að stúlkan, sem allir töldu að væri dóttir hennar, væri það ekki í raun og veru. Eftir dauða eiginmanns hennar hóf hún þó að rannsaka málið og þá kom sannleikurinn í ljós. Katya og Zoya höfðu upp á Luciu og eftir DNA-rannsókn kom á daginn að Lucia var í raun og veru dóttir Zoyu.

Zoya hefur ákveðið að höfða skaðabótamál vegna mistakanna og krefst hún þess að fá greiddar bætur að jafnvirði 5,3 milljóna íslenskra króna.