Mikið óveður skall á Moskvu, höfuðborg Rússlands, í gær og létust að minnsta kosti 13 manns í óveðrinu. Tré féllu til jarðar og þaksteinar flugu um loftin í sterkum vindi en vindhraðinn mældist 80 km/klst. Um 70 manns slösuðust.
Þeir sem slösuðust voru fluttir á sjúkrahús og heilsugæslustöðvar í borginni. Yfirvöld segja ekki ólíklegt að tala látinna eigi eftir að hækka. Interfax hefur eftir Sergej Sobyanin, borgarstjóra, að þetta sé mikill harmleikur og að aldrei áður hafi borgarbúar upplifað neitt viðlíka. Hann sagði að það hafi komið sér sérstaklega illa að óveðrið skall á um miðjan dag og því hafi svo margir látist og slasast.
Mörg hundruð tré brotnuðu og lokuðum vegum og járnbrautarlínum.
Tass fréttastofan segir að óveður sem þetta hafi aldrei áður skollið á borginni. Ekki séu miklir öfgar í veðri í borginni en þó geti á stundum verið hvasst þar á sumrin. Manntjónið í gær er það mesta af völdum veðurs í Moskvu í tæp 20 ár en 1998 létust 11 manns.