Japanir segja komið að beinum aðgerðum vegna eldflaugaskotsins – Bandaríkin segja að stríð yrði hörmulegt
Her Norður-Kóreu skaut eldflaug á loft í nótt, á mánudagsmorgni að staðartíma í Kóreu. Eldflaugin fór um 450 kílómetra áður en hún hrapaði í hafið í efnahagslögsögu Japan, um 200 sjómílur frá ströndum landsins. Þegar fréttist af eldflaugaskotinu sagði Shinzo Abe, forsætisráðherra Japan, að nú væri komin tími til beinna aðgerða gagnvart Norður-Kóreu. Bandarísk stjórnvöld segja að það sé bein ávísun á hörmungar ef til hernaðarátaka kemur við Norður-Kóreu.
Eldflauginni var skotið frá strandbænum Wonsan. Bandaríkjaher segir að um skammdræga eldflaug hafi verið að ræða og að fylgst hafi verið með flugi hennar í þær sex mínútur sem hún var á lofti áður en hún lenti í Japanshafi.
Shinzo Abe fordæmdi eldflaugaskotið og sagði að ekki verði við það unað að Norður-Kórea haldi ögrunum sínum áfram og láti allar aðvaranir frá alþjóðasamfélaginu sem vind um eyru þjóta.
„Eins og við vorum sammála um á G7 fundinum er vandinn varðandi Norður-Kóreu í forgangi hjá alþjóðasamfélaginu. Til að hræða Norður-Kóreu munum við ásamt Bandaríkjunum grípa til beinna aðgerða.“
Í kjölfar fundar G7 ríkjanna á föstudaginn sagði Donald Trump, forseti, að vandinn hvað varðar Norður-Kóreu verði leystur. Jim Mattis, varnarmálaráðherra Norður-Kóreu, sagði í gær að stríð við Norður-Kóreu yrði hörmulegt.
Í þættinu Face the Nation hjá CBS News í gær sagði hann að ef ekki tekst að leysa málið eftir diplómatískum leiðum þá verði hörmulegt stríð. Hann sagði einnig að stríð við Norður-Kóreu yrði líklegast versta stríðið sem núlifandi kynslóðir myndu upplifa.
Einræðisstjórnin í Norður-Kóreu er með mikinn fjölda af fallbyssum og eldflaugum nærri landamærunum við Suður-Kóreu og getur látið sprengjum rigna yfir eitt þéttbýlasta svæði Jarðarinnar, Seoul sem er höfuðborg Suður-Kóreu.
Mattis sagði einnig að Rússlandi og Kína myndi stafa ógn af hugsanlegum átökum.