Styttist í opnun tveggja á Austurlandi – Bjórfræðingur telur ný brugghús muni tengjast öðrum rekstri
Níu örbrugghús eru í rekstri á landinu og auk þess styttist mjög í að tvo til viðbótar hefji rekstur. Algjör sprenging hefur orðið í örbrugghúsum frá því að Bruggsmiðjan á Árskógssandi, sem framleiðir bjór undir merki Kalda, var sett á laggirnar árið 2006, fyrst örbrugghúsa hér á landi.
Ásamt Bruggsmiðjunni eru í rekstri Ölvisholt í Flóahreppi, Gæðingur í Skagafirði, Steðji í Borgarfirði og Segull á Siglufirði. Öll þessi örbrugghús brugga og selja bjór í Vínbúðunum, auk þess að selja bjór til veitingahúsa. Þá rekur veitingastaðurinn og hostelið Kex sitt eigið örbrugghús og hið sama má segja um Bryggjuna brugghús. The Brothers Brewery í Vestmannaeyjum framleiðir bjór sem seldur er á veitingahúsum í Vestmannaeyjum og á höfuðborgarsvæðinu. Þá er ótalið Bjórsetrið á Hólum en þar brugga rekstraraðilar sinn eigin bjór eftir því sem þeim dettur í hug hverju sinni.
Auk þessara níu aðila framleiðir Borg brugghús bjóra sem fallið gætu undir skilgreininguna um örbjóra. Borg er hins vegar í eigu Ölgerðar Egils Skallagrímssonar og vilja helstu sérfræðingar líta svo á að Borg sé í raun bara partur af Ölgerðinni en ekki sjálfstætt örbrugghús.
Tvö ný örbrugghús eru síðan í startholunum, bæði á Austurlandi. Austri á Héraði og Beljandi á Breiðdalsvík stefna bæði á að hefja sölu á bjór nú í sumar, með megináherslu á bjór af krana en þó er mögulegt að einnig verði seldur átappaður bjór.
Stefán Pálsson, Bjórskólakennari og annar höfundur Bjórbókarinnar, hefur fylgst vel með þróun og uppgangi örbrugghúsa hér á landi. Að sögn Stefáns er ærið misjafnt hvernig rekstur þeirra hefur gengið í gegnum tíðina. Þannig er til að mynda Steðji að grunni til reistur á rekstri brugghússins Mjaðar sem rekinn var í Stykkishólmi en lagði upp laupana fyrir nokkrum árum. Þá hefur Gæðingur dregið úr sínum umsvifum í framleiðslu á átöppuðum bjór.
Stefán segist þeirrar skoðunar að næsta kynslóð örbrugghúsa verði að mestu eða jafnvel öllu leyti tengd öðrum rekstri. „Það verða þá aðilar sem brugga sinn bjór í tengslum við annan veitinga- eða skemmtistaðarekstur, eða ferðaþjónustu. Menn verði ekki í þessari framleiðslu til sölu í Vínbúðunum, nema þá að hluta. Við sjáum þess merki nú þegar. Svona örbrugghúsarekstur getur einmitt aukið aðdráttarafl í ferðaþjónustu og það sjáum við til að mynda á Siglufirði og það verður væntanlega einnig raunin með brugghúsin á Austurlandi.“