Héraðsdómur Reykjavíkur dæmdi í vikunni karlmann á fimmtugsaldri í fjögurra mánaða óskilorðsbundið fangelsi fyrir þjófnað og umferðar- og fíkniefnalagabrot. Maðurinn var meðal annars ákærður fyrir að hafa brotist inn í verslun Tónastöðvarinnar í september í fyrra og stolið þaðan gítar að óþekktu verðmæti. Stuttu síðar var hann gómaður í verslun Gallerí Sautján í Kringlunni þar sem hann hafði stolið jakka að verðmæti tæplega 38 þúsund krónur.
Maðurinn var einnig ákærður fyrir að aka undir áhrifum fíkniefna og sviptur ökuréttindum. Maðurinn játaði brot sín fyrir dómi en hann á að baki sakaferil. Auk þess að sæta fjögurra mánaða fangelsi var maðurinn sviptur ökuréttindum ævilangt og dæmdur til greiðslu sakarkostnaðar að upphæð rúmlega 300 þúsund krónur.