Um þessar mundir eru 30 ár liðin frá því að flugstöðin á Keflavíkurflugvelli var vígð. Ýmislegt hefur breyst frá því árið 1987, farþegafjöldinn hefur fimmfaldast og mikil uppbygging átt sér stað á flugvellinum. Isavia óskar nú eftir gömlum ljósmyndum úr flugstöðinni, frá þeim tíma þegar myndir voru teknar á filmu og fatatískan einkenndist af permanenti og krumpugöllum.
Á facebooksíðu Keflavíkurflugvallar gefst fólki tækifæri á að senda inn myndir sem teknar voru í flugstöðinni í upphafi eða við lok utanlandsferðar.
„Flugstöð Leifs Eiríkssonar fagnar um þessar mundir 30 ára afmæli og af því tilefni óskum við eftir gömlum myndum úr flugstöðinni. Þegar afi hafði hár og það voru pálmatré í flugstöðinni, þegar Sigga systir gekk bara í krumpugalla með axlapúðum og þegar þú þurftir að muna að kaupa filmu í myndavélina áður en þú fórst í flugið.“
Þá geta þáttakendur átt von á því að komast út í heim. „Dragðu upp gamla myndaalbúmið og sendu okkur myndirnar af því þegar þú og þínir fóru í gott ferðalag og þú gætir unnið ferð fyrir tvo á áfangastað að eigin vali frá Keflavíkurflugvelli!“
