Samkvæmt tilkynningu frá Vegagerðinni virðist spá um storm og hríðarveður á fjallvegum ætla að ganga eftir í öllum meginatriðum. Byrjar vestan- og suðvestanlands með snjókomu á Snæfellsnesi og sunnanverðum Vestfjörðum um og fyrir hádegi. Efst á Hellisheiði og Mosfellsheiði verður snjóbylur með 16-20 m/s frá því um kl. 12 til 14 en hlánar þar undir kvöld.

Hviðurveður í SA-áttinni undir Hafnarfjalli og á Kjalarnesi, 30-35 m/s þegar líður á morguninn en allt að 40-45 m/s frá því um hádegi og nær hámarki síðdegis. Á Steingrímsfjarðarheiði, Holtavörðuheiði, Bröttubrekku, Þverárfjalli og Öxnadalsheiði versnar veður með skafrenningi og ofankomu, einkum upp úr kl. 15 til 16. Þá verður einnig blint með köflum á Möðrudalsöræfum þegar líður á daginn.

Færð og aðstæður

Óveður er á Kjalarnesi og Grindarvíkurvegi. Vegir eru að heita má greiðfærir á Suðurlandi en nú er að byrja að élja á leiðinni austur fyrir Fjall . Hálkublettir eru á Sandskeiði.

Á Vesturlandi er víðast autt en hálkublettir eru á Holtavörðurheiði og Bröttubrekku.

Óveður og éljagangur er á Fróðarheiði.

Vetrarfærð er á flestum fjallvegum á Vestfjörðum en víðast greiðfært á láglendi. Snjóþekja er á Hrafnseyrarheiði en þæfingsfærð á Dynjandisheiði. Snjóþekja og hálka er á veginum norður í Árneshrepp.

Það er víðast autt á Norðurlandi en þó er hálka eða hálkublettir á fáeinum köflum, aðallega á útvegum.

Á Austurlandi er á köflum hálka eða hálkublettir. Þungfært er á Vatnsskarði eystra og Breiðdalsheiði. Ófært er á Öxi og í Vattarnesskriðum.

Greiðfært er með suðausturströndinni en hálkublettir á útvegum.