Morgundagur tapaði 151 milljón á rekstri fjölmiðilsins í fyrra
Útgáfufélag Fréttatímans tapaði 151 milljón króna á rekstri fjölmiðilsins í fyrra og rúmlega tífaldaðist tapið milli ára, en það nam 13,5 milljónum króna árið 2015. Frá þessu er greint í Markaðnum, fylgiriti Fréttablaðsins í dag.
Útgáfufélagið heitir Morgundagur ehf. en Markaðurinn hefur rekstrarreikning félagsins fyrir árið 2016 undir höndum.
Blaðið greinir frá því að auglýsingatekjur Fréttatímans hafi aukist úr 383 milljónum árið 2015 í rúman hálfan milljarð í fyrra. Útgáfukostnaður Morgundags jókst úr 231 milljón í 369 milljónir og launa- og starfsmannakostnaður fór úr 99,7 milljónum árið 2015 í 223 milljónir 2016.
Það var í nóvember 2015 sem nýir eigendur komu að útgáfu Fréttatímans með Gunnar Smára Egilsson í broddi fylkingar. Mikil óvissa ríkir um framtíð blaðsins eftir að Gunnar Smári sagði skilið við Fréttatímann undir furðulegum kringumstæðum á dögunum og tilkynnti síðan um að hann væri að stofna Sósíalistaflokk Íslands.
Frétt Markaðarins: Tap Fréttatímans nam 151 milljón og tífaldaðist