Hefur ítrekað orðið fyrir kynþáttafordómum innan sem utan vallar
Pape Mamadou Faye knattspyrnumaður segir að hann hafi orðið fyrir kynþáttafordómum strax á fyrstu knattspyrnuæfingunni sem hann mætti á. Það var af hendi þjálfarans en æfingin var hjá Knattspyrnufélaginu Val. Pape, sem nú spilar með Víkingi Ólafsvík, hefur ítrekað orðið fyrir kynþáttafordómum innan sem utan vallar.
Í viðtali við Fótbolti.net lýsir Pape því hvernig hann hefur orðið fyrir aðkasti og fordómum vegna húðlitar síns í gegnum árin. Sem fyrr segir varð hann strax fyrir kynþáttafordómum á fyrstu æfingu hjá Val, sem varð til þess að hann gat ekki hugsað sér að æfa áfram með félaginu. Hann gekk því til liðs við Fylki og ber félaginu vel söguna. Rasisminn hélt þó áfram. Pape segir að þegar hann var kominn upp í 4. flokk hafi hann farið að finna fyrir kynþáttafordómum hjá andstæðingum, sem og áhorfendum. Þannig lýsir hann því að þjálfari hans og foreldrar liðsfélaga hafi næstum því lent í handalögmálum við foreldra andstæðinga Fylkisliðsins, Fjölnis, vegna þess hvaða orð voru höfð uppi. Þá hafi hann spilað leik á Ísafirði þar sem foreldrar kölluðu hann negra úr áhorfendastúkunni.
„Sama sumar spiluðum við í úrslitakeppninni í 4. flokki. Á leikdegi var ég að taka strætó heim úr skólanum þegar ég fékk símtal úr leyninúmeri frá einhverjum sem virtist vera allavega sjö árum eldri en ég. Ég veit ekki hvort að hann hafi verið að reyna að hræða mig eða reyna að vera fyndinn. Hann hótaði mér og sagði: „Helvítis negri, þegar við sjáum þig fyrir leik þá drepum við þig.“ Ég sagði þjálfaranum frá þessu og hann hringdi í KSÍ. Tveir lögreglubílar mættu á leikinn til að fylgjast með og það róaði mig aðeins þó að þetta hafi auðvitað truflað mig í leiknum. Þarna mættust tvö bestu liðin á landinu. Við höfðum unnið andstæðingana fyrr um sumarið 4-1 en við töpuðum 4-3 í úrslitakeppninni. Þetta símtal hafði klárlega áhrif í leiknum. Það kom hins vegar aldrei í ljós hver það var sem hringdi.“
Pape segir að rasismi sé viðvarandi vandamál enn í dag. Hann verði fyrir honum í leikjum og einnig í einkalífinu. „Einu sinni var ég líka á leið heim úr bænum með stelpu sem ég var að hitta þegar maður kom og sagði við hana: „Hvað ertu að gera með þessum fokking apa?“ Þessir aðilar búast ekki við að svarti maðurinn tali íslensku og þeir eru að drulla yfir stelpuna. Þegar þeir fatta að ég tala íslensku þá flýja þeir í burtu. Þetta er ekki bara leiðinlegt fyrir mig heldur líka fyrir stelpuna.“