„Hvar sem hann er þá er hann að hlusta á Eminem og dansa“
Í gærkvöldi settu vinir Arturs Jarmoszko nýjar myndir af honum á netið í þeirri von að þær myndu hrista upp í minni fólk sem hefði mögulega rekist á hann síðustu vikur. Ekkert hefur spurst til Arturs, sem er 26 ára, síðan 1.mars. Myndirnar spanna nokkurra ára tímabil og þar sést hann í hópi góðra vina sem sakna hans sárt og hafa miklar áhyggjur af honum.
Vinkona Arturs, Stefanía Anna Rúnarsdóttir, birti opna færslu á Facebook, með myndum af Arturi sem er pólskur en hefur verið búsettur á Íslandi síðastliðin 5 ár. Skömmu eftir að Artur kom til Íslands fékk hann vinnu á Saffran í Glæsibæ. Hann hætti þar í febrúar á þessu ári. Artur á marga vini sem, hann kynntist í gegnum vinnuna. Þau segja það af og frá að hann sé í rugli líkt og áður hefur verið haldið fram.
Artur býr í Breiðholti ásamt fyrrum vinnufélaga sínum. Síma hans var lokað nýlega og hefur Artur ekki farið inn á Facebook síðu sína í langan tíma en öllum myndum á síðunni hefur verið eytt.
Þá segir í færslunni sem fylgir myndunum:
„Hann er góður vinur, yfirmaður og samstarfsfélagi okkar og við óskum einskis heitar en að fá hann heim eða vita af honum öruggum einhversstaðar. Það eina sem við vitum fyrir víst er að hvar sem hann er þá er hann að hlusta á Eminem og dansa eins og honum einum er lagið.“
Artur er grannvaxinn, dökkhærður með stutt hár, 186 sm á hæð og með græn augu. Talið er að hann sé klæddur í svarta úlpu eða mittisjakka, bláar gallabuxur og hvíta strigaskó.
Lögreglan biður fólk sem getur gefið upplýsingar um ferðir Arturs, eða veit hvar hann er að finna, um að hafa samband við lögregluna í síma 444-1000. Upplýsingum má einnig koma á framfæri í tölvupósti á netfangið gudmundur.pall@lrh.is eða í einkaskilaboðum á Facebook Lögreglunnar á höfuðborgarsvæðinu.
