Verkefni lögreglunnar í gærkvöldi og í nótt
Lögreglan á höfuðborgarsvæðinu handtók tvo ölvaða menn í Breiðholti á tíunda tímanum í gærkvöldi, en mennirnir eru grunaðir um eignaspjöll. Að sögn lögreglu eru mennirnir grunaðir um að brjóta rúður í skóla og skemma bifreið. Þeir voru handteknir vegna rannsóknar málsins.
Á níunda tímanum í gærkvöldi var tilkynnt um eld í hótelbyggingu við Lækjargötu, en eldurinn var sagður á 3. hæð. Slökkvilið var sent á vettvang en eldurinn reyndist minniháttar.
Tveir ökumenn eru grunaðir um akstur undir áhrifum fíkniefna eftir nóttina. Annar var stöðvaður í Hafnarfirði upp úr miðnætti en hinn á Snorrabraut rétt fyrir klukkan tvö í nótt. Þá stöðvaði lögregla ökumann á Reykjanesbraut við Hnoðraholt en bifreiðin var með röng skráningarmerki og ótryggð. Ökumaðurinn var auk þess ekki með ökuréttindi eftir að hafa verið sviptur áður.
Loks var tilkynnt um innbrot í blokkaríbúð í Breiðholti rétt fyrir klukkan fjögur í nótt en verið var að standsetja íbúðina. Tveir menn í annarlegu ástandi voru handteknir og vistaðir í fangageymslu vegna rannsóknar málsins.