Ekkert bendir til að andlát 19 ára íslensks pilts hafi borið að með saknæmum hætti. Þetta segir Van Vyk upplýsingafulltrúi lögreglunnar í Höfðaborg í samtali við Ríkisútvarpið.

Pilturinn fannst látinn á vinsælu útivistarsvæði í nágrenni Höfðaborgar í Suður-Afríku í gær. Hann mun hafa fundist á Tafelberg -fjalli, einu af kennileitum Höfðaborgar og vinsælu útivistarsvæði, eftir að hafa verið saknað frá því í hádeginu á laugardag.

Van Vyk segir að vont veður hafi verið á fjallinu þegar pilturinn lést. Samkvæmt heimildum DV er líklegt að móðir piltsins, faðir og fósturfaðir fari til Höfðaborgar en utanríkisráðuneytið aðstoðar fjölskylduna.

Pilturinn var samkvæmt heimildum DV nýlega kominn til borgarinnar þar sem hann ætlaði að vera við hjálparstörf. Er honum lýst sem afar geðgóðum og hjálplegum ungum manni sem vildi alltaf láta gott af sér leiða.

Ekki er hægt að greina frá nafni piltsins að svo stöddu.