Íslenskur piltur fannst látinn á vinsælu útivistarsvæði í nágrenni Höfðaborgar í Suður-Afríku í gær.

Greint er frá málinu á forsíðu Fréttablaðsins í dag og vísað í fréttir suðurafrískra fjölmiðla.

Þar segir að pilturinn hafi verið nítján ára. Hann mun hafa fundist á Table-fjalli, einu af kennileitum Höfðaborgar og vinsælu útivstarsvæði, eftir að hafa verið saknað frá því í hádeginu á laugardag.

Í frétt Fréttablaðsins kemur fram að dauðsföll af slysförum séu ekki óalgeng á fjallinu. Þá kemur fram í fréttinni að sérstöku eftirliti hafi verið komið á á fjallinu vegna ítrekaðra ránstilrauna.

Ekki hefur verið greint frá dánarorsök en mikill vindur var á svæðinu um helgina.