„Ég elska vísindi, en bara ef vísindalegar staðreyndir eru settar fram af körlum. Ég elska leikhús, en bara þegar karlar leika. Ég horfi á sjónvarpsfréttir, en bara ef karlmaður les þær. Ég elska að borða, en bara ef karlmaður eldar. Væri þetta í lagi?“
Ég elska að borða, en bara ef karlmaður eldar.
Þetta segir Eyrún Magnúsdóttir ritstjóri sunnudagsblaðs Morgunblaðsins í pistli í blaðinu sem kom út í dag. Segir hún fótboltaunnendur ástunda misrétti og Íslendingar verði að horfast í augu við það. Áhuginn sé ekki á leiknum sem slíkum, heldur á körlunum sem spila fótbolta.
„Það er full ástæða til að horfast í augu við þetta og líta á þessa sérstöku tilhneigingu sem ákveðið vandamál sem þarfnast lausnar. Sem fótboltaþjóð þurfum við kannski bara að fara í gegnum einhvers konar endurmenntun þar sem við lærum að elska leikinn fótbolta,“ segir Eyrún.
„Við erum búin að taka á sams konar vanda víða annars staðar í þjóðfélaginu en nú er komið að fótboltavellinum. Förum að einbeita okkur að leiknum frekar en kyni þess sem leikur.“
Ekki eru allir sáttir við þessi skrif. Brynjar Níelsson þingmaður Sjálfstæðisflokksins segir pistilinn birtingarmynd um hvert íslenskt samfélag stefnir.
„Pistlahöfundur kemst að því að fótbolti sé bara fótbolti og engu skipti hverjir spila á vellinum og alls ekki hvers kyns spilararnir eru. Geri engar athugasemdir við þá skoðun. En pistlahöfundurinn telur rétt að senda fótboltaáhugamenn í endurmenntun þar sem þeir horfi frekar á karla spila en konur.“
Hvernig er hægt að segjast hafa áhuga á fótbolta en hafa svo bara áhuga ef hann er spilaður af körlum?
Eyrún bendir á að ýmsar fórnir séu færðar fyrir knattspyrnu, dagskrá hliðrað í sjónvarpi og aðdáendur ferðist á milli landa ef landsliðið sé að spila. Það sé þó aðeins eit skilyrði fyrir þessum áhuga:
„Leikmenn verða að vera karlkyns! Þetta er satt. Svona er þetta. Fáir sem segjast elska fótbolta myndu þó viðurkenna að setja þetta furðulega skilyrði fyrir áhuga sínum. Segjast fyrst og fremst hafa ástríðu fyrir sjálfum leiknum. Segjast elska fótbolta.
En ef það er leikurinn fótbolti sem fólk elskar ætti auðvitað ekki að skipta neinu hvers kyns leikmennirnir eru. En samt er fótboltaáhugi ekki kynjablindur. Þetta er í raun furðulegt fyrirbæri,“ segir Eyrún og hvetur Íslendinga til að styðja við bakið á íslenska kvennalandsliðinu á Evrópumótinu í sumar.
„Hvernig er hægt að segjast hafa áhuga á fótbolta en hafa svo í raun bara áhuga ef hann er spilaður af körlum?“
Brynjar Níelsson er eins og áður segir ekki hrifinn af skrifum Eyrúnar og kennir þau við öfga femínisma og gefur í skin að málflutningur sem þessi sé hættulegri en það sem Donald Trump stendur fyrir.
„Ég spáði því fyrir mörgum árum að ég yrði fyrsti maðurinn sem fengi frítt fæði og húsnæði í feminíska Gulaginu.“
Segir Brynjar að hann verði ekki einn í skála.
„Kannski ætlar frjálslynda og umburðarlynda fólkið að flytja inn kínversku menningarbyltinguna með húð og hári. Svo halda allir að Trump sé hin fasíska ógn sem steðjar að heiminum“.