„Það er alltaf vandamál með þessa stráka. Þeir eru bara að hanga í bílnum, borða og drekka. Einn þeirra skildi svo orkudrykk eftir í strætónum og ég fór með drykkinn til hans og bað hann að taka hann. Þá beit hann mig í höfuðið.“

Svo lýsir strætóbílstjóri í Reykjanesbæ upplifun sinn af árás sextán ára pilts í gær í samtali við Víkurfréttir. Lögregla lýsir eftir vitnum af árásinni. Athygli vekur að margir urðu vitni af þessu en einungis tveir komu bílstjóranum til varnar, tveir erlendir karlmenn.

Bílstjórinn segist vera hræddur við að mæta á ný til vinnu en hann var fluttur á Heilbrigðisstofnun Suðurnesja til aðhlynningar. Guðlaugur H. Sigurjónsson, sviðstjóri Umhverfissviðs, segir í samtali við Víkurfréttir að nú sé mælirinn fullur. Unglingar hangi allan liðlangan daginn í strætó með tilheyrandi ónæði og skemmdarverkum. „Nú þegar farið er að ráðast á bílstjóra líka er mælirinn fullur. Á þessu þarf að taka og það verður gert.“