Akureysk kona hefur verið dæmd í 45 daga skilorðsbundið fangelsi fyrir líkamsárás gegn fyrrverandi sambýlismanni sínum. Atvikið átti sér stað á heimili mannsins á Akureyri þann 29. maí síðastliðinn.

Samkvæmt dómi veitist konan að sambýlismanninum og henti að honum ilmvatnsglasi og blómapotti úr leir. Því næst sló hún hann ítrekað og klóraði, áður en hann náði að yfirbuga hana. Afleiðingar árásar hennar var að maðurinn hlaut klórför í kringum háls, á bringu og niður að lífbeini, á handleggjum og yfir olnbogum, á fótum og á mjöðm, eymsli í hnjám og baki, og kúlu yfir úlnlið.

Konan var jafnframt ákærð fyrir að hafa brotist inn til hans en fallið var frá þeim hluta sakaratriða. Dómari taldi 45 daga skilorðsbundið fangelsi hæfilega refsingu þar sem konan viðurkenndi sök og vegna „tiltekinna einkalífsvandkvæða hennar“, líkt og það er orðað í dómi.