Á annan dag jóla fundust lík tveggja kvenna og tveggja barna í kjallara húss í Troy í New York. Konurnar voru 36 og 22 ára og börnin voru 11 ára drengur og 5 ára stúlka. Konurnar voru sambýliskonur og önnur þeirra átti bæði börnin.
James Tedesco, lögreglustjóri, skýrði frá þessu á blaðamannafundi að sögn Timesunion og fleiri bandarískra fjölmiðla. Lögreglan hefur ekki skýrt frá því hvernig fólkið var myrt eða hvenær það var myrt.
„Þetta er það versta sem við höfum upplifað. Aðeins villimaður gerir eitthvað eins og þetta. Enginn sem kemur að þessu máli mun gleyma því.“
Sagði lögreglustjórinn á fundinum. Hann sagði að vísbendingar á vettvangi bendi til að ekki hafi verið um tilviljanakennd morð að ræða. Lögreglan hefur engan sérstakan grunaðan um morðin á þessari stundu en hefur biðlað til almennings um upplýsingar.
Það var leigusalinn sem fann líkin og gerði lögreglunni viðvart. Hann fór til að kanna með fólkið eftir að ættingjar þess höfðu sett sig í samband við hann en þeir höfðu ekki náð sambandi við fórnarlömbin.
Bandarískir fjölmiðlar segja að málið líkist morðmáli frá 2014 en þá var fjögurra manna fjölskylda myrt í aðeins 16 km fjarlægð frá morðvettvanginum í Troy. Það var í október það ár sem Jin Feng Chen, 39 ára, og Hai Yan Li, 38, fundust látin ásamt tveimur sonum þeirra, 10 og 7 ára. Fjölskyldan hafði verið myrt á hrottalegan hátt. Málið er enn óupplýst.