„Þingflokkur Samfylkingarinnar er klofinn eftir aðeins 55 daga farsælt samstarf,” skrifar Logi Einarsson, formaður Samfylkingarinnar, á Facebook-síðu sína og kennir hann nýbökuðum þingmanni flokksins, Guðmundi Andra Thorssyni um klofninginn.
Samkvæmt Loga er það tónlistarlegur ágreiningur sem hefur klofið flokkinn, nánar tiltekið eftirfarandi stöðufærsla Guðmundar Andra Thorssonar í gær:
Það getur reynt á geðprýði manns að vera í Hagkaupi að leita að möndludropum meðan dynur á manni hin átakanlega útgáfa Bruce Springsteen á laginu Santa Claus is coming to town. Hann syngur þetta eins og klipinn glóandi töngum og þráspurður um hernaðarleyndarmál en harðneitar að segja neitt nema þetta – Jólasveinninn er að koma í bæinn! – aftur og aftur, tímunum saman. Mætti ég biðja Hagkaup um að spila bara frekar jólaplötuna frá SG, þessa með Ellý og Vilhjálmi að syngja lagið hans Jóns bassa um Jólin jólin alls staðar?
Loga misbýður mjög þessi yfirlýsing flokksfélaga síns og skrifar:
Guðmundur Andri lýsti því yfir á Facebook að þrátt fyrir sextíu ára starf hafi rokkið ekki getið af sér lag sem fangar anda jólanna.
Því er ég ósammála. Rokkið gat af sér fjölda tónlistarmanna sem hafa vissulega haldið í ólíkar áttir en eru afsprengi þess og auðvitað annarra strauma líka.
Jólin snúast í mínum huga lítið um bjöllur, skraut og svona Rokkokkó dót. Meira um samkennd, samveru og frið.
Margir rokkarar og nágrannar þeirra hafa fært okkur ótal perlur sem fanga einmitt þetta og minna okkur á að það hafa ekki allir það jafn gott. Þær tendra a.m.k. minn jólaanda.
Eftirfarandi lög eru ómissandi hluti af mínu jólahaldi.
Steve Wonder, One little christmas tree.
Tom Waits, Christmas card from a hooker in Minneapolis.
Kinks, Father Christmas.
Iggy Pop, White Christmas.
Snoop Dogg, Santa Claus goes straight to the ghetto.
John Prine, Christmas in prison.
Nick Lowe, Christmas at the airport.
Kærar þakkir fyrir farsælt samstarf Guðmundur Andri.
Logi endar færslu sína á því að deila myndbandinu hér að neðan með jólalagi Tom Waits
[youtube https://www.youtube.com/watch?v=mxVo5mjK4eg&w=560&h=315]
