Hljómsveitin Kaleo var vinsælasta leitarorðið yfir mest gúggluðu Íslendingana á alþjóðavísu á árinu 2017. Gylfi Sigurðsson var sá Íslendingur sem Íslendingar gúggluðu hvað oftast. Þetta kemur fram í árlegri úttekt auglýsingastofunnar H:N Markaðssamskipta.
„Hljómsveitin Kaleo ber höfuð og herðar yfir mest gúggluðu Íslendingana á alþjóðavísu. Hljómsveitin var gúggluð ríflega 3,6 milljón sinnum um allan heim á árinu sem er að líða. Kaleo sló sem kunnugt er í gegn á árinu sem er að líða og eru meðal annars tilnefndir til Grammy-verðlauna fyrir lagið Way down we go. Þá hituðu þeir meðal annars upp fyrir Rolling Stones á árinu,“
kemur fram í fréttatilkynningu frá H:N Markaðssamskipti.
„Of Monsters and Men er í öðru sæti yfir mest gúggluðu Íslendinganna á alþjóðavísu en sveitin var gúggluð um 1,3 milljón sinnum og Björk í því þriðja þar með tæpar 900 þúsund leitarniðurstöður.“
Gylfi Sigurðsson er í fjórða sæti og crossfit-konan Sara Sigmundsdóttir er í því fimmta. Hljómsveitin Sigur Rós er í fimmta sæti og listamaðurinn Ragnar Kjartansson í því sjötta.
Síðustu ár hefur bardagakappinn Gunnar Nelson verið á topp tíu listanum en komst ekki á listann í ár.
„Gylfi er hins vegar sá sem Íslendingar gúggluðu lang oftast og Kaleo næst oftast. Fróðlegt er að sjá hvað fólk gúgglaði Gylfa mun oftar í kringum vistaskiptin hans til Everton í ágúst.“
Söngkonan Björk og stjórnmálamaðurinn Sigmundur Davíð Gunnlaugsson deila þriðja og fjórða sætinu saman og Guðni Th. Jóhannesson og Of Monsters and Men deila fimmta og sjötta sætinu.
Baltasar Kormákur og Katrín Jakobsdóttir deila sjöunda til ellefta sæti með rithöfundum Yrsu Sigurðardóttur og Arnaldi Indriðasyni.
Bjarni Benediktsson fjármálaráðherra og Benedikt Sveinsson, faðir hans, eru svo í 13. – 15. sæti listans með Ólafi Ragnari Grímssyni, fyrrverandi forseta.
„Þetta er í fjórða sinn sem H:N Markaðssamskipti gera úttekt á mest gúggluðu Íslendingunum. Listinn er langt frá því að vera tæmandi og ber að líta á „gúggllistann” sem samkvæmisleik frekar en heilagan sannleik.“