Sveinn Andri Sveinsson lögfræðingur hefur tekið að sér að sækja skaðabætur til fyrirtækisins 1984 fyrir Eirík Jónsson. Eiríkur á og rekur síðuna eirikurjonsson.is, en þar flytur Eiríkur fréttir héðan og þaðan úr þjóðlífinu. Frá þessu greinir Eiríkur sjálfur.

Síða Eiríks hvarf í kerfishruninu mikla hjá 1984 um miðjan síðasta mánuð. Neyddist Eiríkur til að láta hanna nýjan vef. Í frétt Eiríks segir að Mörður Ingólfsson framkvæmdastjóri 1984 hafi greint frá því að engar tryggingar væru til staðar og mætti líkja hruninu við náttúruhamfarir. Mörður Ingólfsson þessi er vel þekktur í samfélagi Pírata en það vakti athygli þegar hann fékk þingmennina Smára McCarthy og Helga Hrafn Gunnarsson til að reyna að bjarga gögnum. Sveinn Andri segir um málið:

„Þetta eru ekki náttúruhamfarir. Þetta er tækjabilun.“

Segir Eiríkur að skaði hans af hruninu sé nokkur hundruð þúsund króna. Sveinn Andri tekur það að sér ókeypis að sækja skaðabætur fyrir Eirík. Ástæðan fyrir gjafmildi Sveins er að Eiríkur varð á dögunum fimm þúsundasti viðskiptavinur lögmannsstofu Sveins Andra. Af því tilefni fær Eiríkur ókeypis aðstoð til að reyna sækja skaðabætur til 1984.

Sveinn Andri sagði:

„Vissulega eru þessi verkefni ekki öll jafn skemmtileg en sem betur fer eru þau fjölbreytileg. Fjölbreytnin er líka forsenda þess að hafa gaman í vinnunni. Það er síðan bónus að fá eitthvað borgað. Sem er sjaldnast.

Í tilefni þessara merku tímamóta fékk sá viðskiptavinur sem átti verkefni númer 5.000 ókeypis lögfræðisþjónustu. Viðkomandi komst við þegar hann frétti af því hversu stálheppinn hann væri.“