Hæstiréttur hefur staðfest tveggja mánaða skilorðsbundin fangelsisdóm Magnúsar Skarphéðinssonar, formanns Sálarrannsóknarfélags Reykjavíkur og formanns félags áhugafólks um fljúgandi furðuhluti, vegna kynferðisbrots hans gegn tveimur sautján ára piltum í Laugardalslauginni árið 2014.
Hæstiréttur lækkaði þó þær skaðabætur sem Magnús þarf að greiða piltunum úr samtals einni milljón króna í hálfa milljón króna. Magnús þarf nú að greiða öðrum piltinum þrjú hundruð þúsund krónur en hinum tvö hundruð þúsund krónur. Magnús þarf þó að greiða allan áfrýjunarkostnað málsins, níu hundruð þúsund krónur.
Magnús var dæmdur fyrir að hafa sagt við annan piltinn að hann ætlaði að taka hann í rassgatið. Því næst togaði Magnús í buxnastrenginn á sundbuxum piltsins. Magnús bar fyrir sig að þetta hafi verið „gamnislagur“.
Pilturinn lýsti því á annan veg fyrir dómi: „Ákærði hafi haft orð á því að þeir væru vel byggðir. Hafi hann síðan spurt þá hvort hann ætti að taka þá í rassgatið. Það hafi ekki verið sagt í neinu gríni og komið alveg upp úr þurru. Fram að því hafi þeir átt venjulegar samræður og hafi þeim brugðið við þessi orð ákærða. Ákærði hafi komið yfir til brotaþolans í heita pottinum og hann hafi þá reynt að forða sér frá ákærða en ákærði hafi reynt að snerta kynfæri hans með því setja hönd inn fyrir sundbuxurnar hans.“