Í síðustu viku stöðvuðu ítalskir lögreglumenn akstur karlmanns á fimmtugsaldri, nærri bænum Gizzeria, til að kanna með ástand hans og ökuréttindi. 9 ára sonur mannsins var með honum í bílnum. Ástand drengsins var þannig að lögreglumennirnir fylltust grunsemdum um að ástandið á heimilinu væri ekki gott. Þeir fylgdu feðgunum því heim og þar blasti óhugnanleg sjón við þeim.

Þar fundu þeir 29 ára konu og 3 ára dóttur hennar í kjallara. Konan er frá Rúmeníu en kom til Ítalíu fyrir 10 árum og leigði herbergi hjá manninum. Grunur leikur á að maðurinn hafi haldið henni fanginni í öll þessi ár og hún hafi verið þræll hans. Hann er grunaður um að hafa beitt hana ofbeldi og að hafa ítrekað nauðgað henni.
LaCnews24 skýrir frá þessu.

Á þessum 10 árum hafði konan eignast tvö börn með manninum, stúlkuna og drenginn sem eru nefnd hér að ofan. Repubblica segir að maðurinn hafi ekki leyft konunni að leita til læknis í tengslum við meðgöngunar og fæðingarnar.

Aðstæður í húsinu voru hræðilegar. Þar var mikið af skordýrum og músum, salernisaðstaðan var úr rusli og rúmin úr pappa. Ekkert vatn eða rafmagn var í kjallaranum og stór keðja á hurðinni til að halda konunni og börnunum inni. Lögreglumenn urðu að bera grímur til að geta verið inni.

Konan sagði lögreglunni að hún hafi oft verið bundin við rúmið og misþyrmt og að sonur hennar hafi verið neyddur til að beita hana ofbeldi.

Maðurinn var handtekinn og er nú í gæsluvarðhaldi. Konan og börnin eru nú í umsjá ítalskra yfirvalda og fá viðeigandi aðstoð.

Hér er hægt að sjá upptöku frá ítölsku lögreglunni af hryllingskjallaranum.