Minnst 85 eru látnir eftir að hópur manna skaut og varpaði sprengjum á hóp fólks í mosku á norðanverðum Sínaískaga í Egyptalandi í morgun.

Um er að ræða eina mannskæðustu hryðjuverkaárás sem gerð hefur verið í heiminum það sem af er ári.

Árásin var framin í Bir al-Abed, vestur af borginni Arish en auk þeirra sem létust særðust tugir, sumir alvarlega.

Samkvæmt egypskum fjölmiðlum komu mennirnir á fjórum stórum bílum, vopnaðir skotvopnum og sprengjum.

Abdel Fatta el-Sisi, forseti Egyptalands, kallaði til neyðarfundar eftir atvikið. Öryggissveitir í Egyptalandi hafa á undanförnum misserum barist við uppreisnarmenn úr röðum ISIS-hryðjuverkasamtakanna á norðanverðum Sínaískaga.

Þegar þetta er skrifað hefur enginn lýst ábyrgð á ódæðinu en liðsmenn ISIS hafa myrt lögreglumenn og hermenn á svæðinu á undanförnum árum.