Joanna Krupa brá heldur í brún þegar hún hugðist fá sér brauðsneið af Lífskornabrauði frá Myllunni í dag. Svo virtist sem búið væri að baka plast inn í brauðið. Í samtali við DV taldi Joanna að þetta væri annað hvort verið hanski eða límband.

Guðjón Pálsson, hjá Myllunni, segir í samtali við DV að þetta sé vissulega plast og eigi alls ekki að rata í brauðið. „Þetta hefur ekki gerst áður. En við vitum hvað þetta er, þetta er svokölluð varnarlíming, utan um rúg. Þær eru tvöfaldar og þetta er sett inn til að vernda innihaldið ef umbúðirnar skyldu rofna. Þetta er plast sem er sérstaklega gert í þeim tilgangi og það er haft svona skær blátt til að auka sýnileikann,“ segir Guðjón.

Hann segir Myllan muni hafa samband við Joannu og gera vel við hana. „Þetta er ekki hættulegt. Þetta er það sterkt og ætti ekki að rofna en það hefur eitthvað gerst þarna. Við verðum í sambandi við hana og ætlum að gera eitthvað fyrir hana, því þetta er leiðinlegt. Þetta er gott að því leyti að við þurfum nú að skoða þetta betur í gæðakerfinu okkar,“ segir Guðjón.