„Það er rosalega erfitt og subbulegt að draga þetta mál fram núna en ég geri þetta fyrir næstu kynslóð stelpna sem eru að vaxa núna, svo þær þurfi síður að lenda í þessu,“ segir Björk Guðmundsdóttir tónlistarkona um hvers vegna hún steig fram nýlega með ásakanir sínar á hendur danska kvikmyndaleikstjóranum Lars Von Trier um kynferðislega áreitni frá þeim tíma er hún lék í kvikmynd hans, Dancer in the Dark.
Þetta kemur fram í Fréttablaðinu í dag. Björk segir enn fremur að kynferðisleg áreitni af þessu tagi snúist ekki um kynlíf heldur völd. „Það er verið að brjóta fólk niður svo það fái ekki að skína.“ Segir Björk að konur sem láti ekki til leiðast séu rægðar og bornar út um þær sögur. Lars von Trier hafi breitt út alls konar lygasögur um hana og meinta furðulega hegðun hennar við vinnu á kvikmyndinni. Allt hafi það verið uppspuni.
Björk segir einnig að hún hafi ekki greint frá áreitninni á sínum tíma af ótta við að vera stimpluð hysterísk. Það séu allt aðrir tímar í dag og samfélagsmiðlarnir ljái konum vettvang til að stíga fram og láta rödd sína heyrast um þessi mál.
Nýjasta plata Bjarkar, Utopia, kemur út þann 24. nóvember.