Skipting fjármála- og efnahagsráðuneytisins í tvö ráðuneyti gæti kostað skildinginn
Fréttir þess efnis að skipta ætti upp fjármála- og efnahagsráðuneytinu í stjórnarmyndunarviðræðum Sjálfstæðisflokksins, Vinstri grænna og Framsóknarflokksins, hafa kvisast til fjölmiðla. Fylgt hefur sögunni að Framsókn fengi þá efnahagsráðuneytið í sinn hlut og jafnvel að Sigurður Ingi Jóhannsson myndi taka við lyklavöldum þar. Bjarni Benediktsson yrði þá fjármálaráðherra. Ef af verður má gera ráð fyrir því að kostnaðurinn við breytingarnar yrði um hálfur milljarður króna á kjörtímabilinu.
Stjórnarmyndunarviðræður flokkanna þriggja hófust á þriðjudaginn í þessari viku og hafa fylkingarnar fundað stíft síðan sú vinna hófst. Málefnasamningur flokkanna er í vinnslu og þá funduðu formenn flokkanna með Samtökum atvinnulífsins og ASÍ skömmu fyrir prentun blaðsins. Ástæðan er að sögn Sigurðar Inga Jóhannssonar sú að kjaralotan sem framundan er mun verða eitt stærsta verkefni nýrrar ríkisstjórnar og því sé mikilvægt að átta sig á stöðunni í heild sinni.
Auðheyrt er af viðtölum við formennina að góður gangur er á viðræðunum og þeir bjartsýnir á að niðurstaða, sem allir geta sætt sig við, náist. Sagði Bjarni við fjölmiðla að málefnasamningur gæti legið fyrir um helgina og yrði þá kynntur rétt eftir helgi.
Þá hefur skipting ráðherraembætta verið rædd lauslega. Gengið er út frá því að Katrín Jakobsdóttir verði forsætisráðherra nýrrar ríkisstjórnar en á móti fengi Sjálfstæðisflokkurinn fleiri ráðuneyti. Alls voru ráðneytin tíu talsins í tíð fráfarandi ríkisstjórnar og féllu fimm slík embætti í skaut Sjálfstæðisflokksins, þrjú í skaut Viðreisnar og Björt framtíð hlaut tvö ráðherraembætti. Teiknuð hefur verið upp sú mynd að Sjálfstæðisflokkurinn fái aftur fimm ráðherraembætti en Vinstri græn og Framsóknarflokkurinn fái þrjú slík embætti hvor flokkur. Þá þarf að skipta upp ráðuneytum og eins sagt er í inngangi fréttarinnar beina Bjarni og Sigurður Ingi augum sínum að fjármála- og efnahagsráðuneytinu.
Slík aðgerð er ekki ókeypis. Varlega áætlað er kostnaðurinn við slíka skiptingu um 120 milljónir króna ári, eða um hálfur milljarður króna á fjögurra ára kjörtímabili, endist stjórnin svo lengi. Þá er tekið mið af skiptingu innanríkisráðuneytisins sem fyrir síðasta kjörtímabil var skipt í dómsmálaráðuneyti annars vegar og samgöngu- og sveitarstjórnarráðuneyti hins vegar.
Þessar hugmyndir um skiptingu ráðuneytanna voru bornar undir stjórnmálaleiðtogana áður en blaðið fór í prentun. Sigurður Ingi og Bjarni gáfu báðir í skyn að ýmsar hugmyndir væru í vinnslu og að skipting ráðuneyta væri ekki aðalatriðið í vinnunni. Katrín var skýrari í sínum svörum og sagði að henni hugnaðist ekki hugmyndin um skiptingu ráðuneytanna. Ekkert er skal þó útiloka í þeim efnum.
Þegar hugmyndin var borin undir formann Samfylkingarinnar, Loga Einarsson, sagði hann að ekki væri ásættanlegt að nota ráðuneyti sem skiptimynt í samningum. „Almennt séð skiptir mestu máli að ráðuneyti séu nógu sterk og öflug til að ráða við sín hlutverk. Það er aldrei ásættanlegt að fjölgun ráðuneyta sé notuð sem skiptimynt til að lemja saman stjórnarsáttmála. En meðan þessar fréttir eru óstaðfestar, hef ég lítið um það að segja fyrr en ég sé málefnasamninginn. Það sem mestu máli skiptir er að breyta samfélaginu þannig að skipting gæða sé með ásættanlegum hætti,“ sagði Logi.