Hæstiréttur hefur þyngt dóm yfir Bergi Axelssyni í 12 mánaða fangelsi, en þar af eru níu mánuðir skilorðsbundnir. Hann hafði áður verið dæmdur í níu mánaða fangelsi. Bergur var sakfelldur fyrir að hafa tekið ófrjálsri hendi um 42 milljónir króna af bankareikningi níræðs alzheimersjúklings sem nú er látinn. Bergur þekkti manninn í áratugi en hann var í sveit hjá honum.

Bergur sagði fyrst í skýrslutöku hjá lögreglu að hann hafi litið á milljónirnar sem gjöf eða jafnvel arf en fyrir dómi sagði hann að þetta hafi verið lán. Hann gaf enga haldbæra skýringu á því hvers vegna honum þótti ekkert athugavert við að þiggja svo háa fjárhæð af manninum. Gamli maðurinn hafði aldrei verið fær á sviði fjármála og segir í dómi að Bergi gat ekki dulist það eftir áratuga kynni af honum.